Act 2 | MED | STEP | Pendikos ui ni, urum ei kᵾn, Jisas nga mondᵾk pᵾtᵾng wamp nimbᵾ ok, manga tila tᵾk, mᵾk rok morung.

Acts 2

Muⱡnga Wingti Mana Urum

1 Pendikos ui ni, urum ei kᵾn, Jisas nga mondᵾk pᵾtᵾng wamp nimbᵾ ok, manga tila tᵾk, mᵾk rok morung. 2 I etᵾk moⱡina, tᵾngᵾnda mint, wi muⱡ ila, kona kᵾpkᵾ mam mel rom ropa omba, morung manga nila, mukᵾr urum. 3 Ei kᵾn, kandrung mel, ndip anmbil mel mat, ngᵾnt ropa omba, wamp nimbᵾ nga peng ombil mbila, elpa elpa ndip mel nomba murum. 4 Wamp ila morung nimbᵾ, Muⱡnga Wingti ei ndi, peka roⱡnga, mbo ik nᵾm kan elpa elpa mbila nᵾtᵾng.

5 Wote ni kᵾn, Jura wamp mat, Got nga ik ei, pilik etmin. Muⱡ kᵾmp mbila, petmin wamp mbᵾ, Jerusalem kona ila manga poning ok, morung ku. 6 Wamp minal, kona kᵾpkᵾ rom ropa, ik nitim ni pilik, ok mᵾk rok morung. Ei nambuⱡ emel, mondpa pili wamp nimbᵾ ndi, muⱡ kᵾmp mbila, orung wamp nimbᵾ nga ik nuim kan elpa elpa tek nilingina, pilik min ngᵾn mondᵾk morung. 7 Min ngᵾn mondᵾk, wote numan ou nduk pilik, ei mel nᵾtᵾng, “Ik nimᵾn wamp kᵾⱡ, Galili wamp kᵾⱡ ant ko, wote tᵾn nga ik nuim kan tek elpa elpa nilingina, pᵾnmᵾn ei, etᵾk ninmin mel nant nda? 9 Tᵾn ya wamp elpa elpa omp mormᵾn mbᵾ, kona Partiya, Midiya, Elam, Mesopotemiya, Judiya, Kaparosiya, Pontas, Eisiya kᵾn, wote Prigiya, Pampiliya, Isip kᵾn, wote Libiya orunga nondpa tetᵾm kona Sairin, Rom kona mbila pᵾkᵾ kᵾn, Jura wamp kᵾn, wote wamp rᵾⱡaip elpa ok, Jura wamp rarᵾng mbᵾ kᵾn, Krit kona kᵾn, Areipiya kᵾn, kona elpa elpa kᵾⱡ ila nga mormᵾn wamp mbᵾ, wote Galili wamp kᵾⱡ ndi, tᵾn nga ik nuim kan mendpᵾⱡ ila, Got nga uⱡ ronduⱡ itim mbᵾ nilingina, pᵾnmᵾn ei ka!” nᵾtᵾng. 12 Wamp nimbᵾ ndi pilik, min ngᵾn mundᵾk, numan orunga mbun tᵾk, wamp mat ndi, mat waldᵾk, nᵾk mel, “Uⱡ ei etpa, enim mel nant nda?” nᵾtᵾng. 13 Wote, wamp mat ndi, mondᵾk pᵾtᵾng wamp nᵾkᵾⱡ, tᵾk ik kuldᵾk nᵾk mel, “Wamp kᵾⱡ, nu wain nok, kekilip ronmin!” nᵾtᵾng.

Pita Ndi, Wamp Mbᵾ Nga Mou Ila Anggilpa Ik Nitim

14 Ui ni kᵾn, Pita kᵾn elim nga kongun rᵾp rok etmin wu 11 nᵾkᵾⱡ kᵾn, oⱡa anggilik molk, Pita ndi, ik ronduⱡ oⱡa ndupa, wamp minal ok morung nimbᵾ, kundpa nimba mel, “Enim Jura wamp, mbᵾ kᵾn, wote Jerusalem kona ila mormᵾn wamp mbᵾ kᵾn, kum tek muⱡᵾi! Na ndi, ya enim uⱡ kanmin ei nga puⱡ ei, kundᵾp namp. 15 Enim ndi pilik, wamp kᵾⱡ, nu ronduⱡ nok, kekilip ronmᵾn, nᵾk pᵾnmᵾn, ei mon! Akup kona ant mong 9 kilok mᵾkᵾlmᵾ unt ei ka! 16 Uⱡ ei nga, pai nui wu Joel ndi, pai nomba ei mel nitim,

17 ‘Got ndi, nimba mel, muⱡ mᵾi raⱡ pora nimba ui ila, uⱡ ei mel itimp nitim. Na ndi, na nga Muⱡnga Wingti ei, wamp mbᵾ kᵾn, oi ndup mundamba. Enim nga kangᵾmᵾl mbᵾ kᵾn, mbᵾⱡamᵾl mbᵾ kᵾn, na nga ik ei, pai nok ninding. Enim nga kang wu mbᵾ, uⱡ wote pemba mbᵾ kᵾning. Wote, enim nga wu anda mbᵾ ndi, ur kump etᵾk kᵾning. 18 Ui ei kᵾn ku, na nga kongun wu na, kindmant amp na mbᵾ, na nga Muⱡnga Wingti ei oi ndamba, uⱡ akil tepa etmba mbᵾ, pai nok ning. 19 Na ndi, wi muⱡ ila uⱡ rᵾpndi mat itimp. Wote, mana mᵾi ila, uⱡ kᵾni nᵾkᵾni mat itimp. Ei kᵾn, mema romba ku, wote ndip nangga, ᵾkᵾl mam mba, kona ant ei tᵾpa, rumbᵾⱡ mondᵾmba. Wote, kona kalimp ei, kunt etpa, mema mel raⱡmba. Uⱡ i etmba ei, kuimp tepa ekit wangga. Wote Nuim ndi, elim nga uⱡ eng nui kai mbila nga, pol ila moⱡpa, yant wangga ui ou ei, ekit omba. 21 Wote ei kᵾn, wamp nam ti ndi, elim nga Nuim ei nga mbi ila, wi rom ndam, wamp ei etpa tᵾmba,’ nitim.
22 Enim Isrel wamp kᵾⱡ, ik ei kum tek pilᵾi! Nasaret kona ila nga Jisas, Got ndi, elim nga ronduⱡ ei ngurum. Elim ndi, kongun ronduⱡ na, uⱡ rᵾpᵾndi ronduⱡ na, uⱡ kai mbᵾ itim ei, enim pilik ketᵾng ni ka!

23 Muⱡ mᵾi raⱡ mim iti nᵾti kᵾn, Got elim nga numan ila, Jisas kᵾn uⱡ, wote pimba mbᵾ, pilpa pora ndurum. Uⱡ ei tᵾp, Jisas enim nga ki ila tendᵾmba. Wote, enim uⱡ kit etmin wu mbᵾ ndi, Jisas nde peta ila rok kunding, nᵾtᵾng ei mel etᵾng. 24 Wote Jisas ni, Got ndi, wamp kui nga uⱡ ila, ⱡoporpa tᵾpa oⱡa mundrum. Wamp kui nga uⱡ ei ndi, imp muⱡi nᵾmbrᵾm. Ei nambuⱡ emel, wamp kui nga uⱡ ei nga ronduⱡ ti mon. 25 Uⱡ ei nga, Depit ndi, Nuim ei nga nimba mel,’

Na kᵾndᵾr ei, Nuim ei, na kᵾn rᵾk rᵾk morum. Nambuⱡ emel, na nga ki mbo orung murum. Ei nga, mbun mat na kᵾn ui nawᵾmba. 26 Ei kᵾn, na nga numan ei kai punt. Wote, na nga ik ei, nimp ei nga kai pilip nᵾnt. Wote, na nanim kᵾng orunga mel kai ti timp ei nga, na nokundᵾp mor. 27 Ei nambuⱡ emel, nim ndi, na nga min ei, wamp kui nga kona ila, wak rui nᵾri. Wote nim ndi, nim nga kongun Wu Wingti ei, wamp on kona ila, pepa purangga ni nandᵾtᵾn mon. 28 Nim ndi, na uⱡ nga kont mbo, muⱡimp nombuⱡa mam ei, tᵾk ora ndurun. Wote, nim na kᵾn morun uⱡ ei ndi, ambuⱡpa puⱡ uⱡ ei, na kᵾn peka ropa morum,’ nitim.
29 “Angmᵾn! Na ndi, enim ik mendpᵾⱡ ti, kundᵾp nimp ent ei, kum tek pilᵾi! Tᵾn nga anda kouwᵾ Depit kurum on kona kut ei, akup tᵾn mormᵾn ui ila tetᵾm ku. 30 Wu ei, painui wu ei nga, Got ndi, elim kᵾn, nimba mᵾi ropa nitim ik ei pitim. Got ndi, nimba mᵾi ropa, mi tepa, Depit elim nuim mumuk murum ei mel ku. Elim nga mepa tem wamp pundun ti tᵾp, Depit nga koⱡ ila mundimp. 31 Depit ndi, Got nga wote etmba uⱡ mbᵾ pitim ei ndi, Depit ndi, Kraist koⱡpa, rut nimba moⱡmba ei nga nimba mel,

‘Wu ei, wamp kui kona ila piyangga nimba, wak rui nᵾrᵾrᵾm. Wu ei nga kᵾng kᵾⱡ, wamp on kona ila, tepa puri nᵾpᵾrangga!’ nitim.
32 Wu Jisas ei, Got ndi, wamp kui nga kona ila, ⱡoporpa tᵾpa, oⱡa mundrum. Wu ei, tᵾn kᵾnmᵾn ei nga, para ndup ninmᵾn. 33 Akup, Jisas wi muⱡ kona, Got nga ki mbo orunga morum. Tipam ndi, Muⱡnga Wingti nguimp nimba mi titim ei mel nguⱡnga, enim akup pilik kandᵾk enmin ei, elim nga memp ei, tᵾn kᵾn oi ndupa ngonum. 34 Depit elim muⱡ kona pi nᵾpᵾrᵾm. Ei wote, elim ndi, nimba mel,

‘Nuim ei ndi, na nga Nuim ei kundpa, nim okᵾn, na nga ki mbo orunga moⱡana! 35 Wote, na ndi, nim nga el rui wamp mbᵾ tᵾp, nim nga kump puⱡ ila mana orunga mundim,’ nitim.
36 Ei nga, enim Isrel wamp pilik kai enmin. Wu Jisas ni, enim ndi rok, nde peta ila pendᵾtᵾng wu ni, Got ndi tᵾpa, Kraist Wu Nuim mundrum!” ei nga Pita ndi nitim.

Wamp Minal Numan Ropᵾl Rok Nu Tᵾtᵾng

37 Wamp mbᵾ, ik ei pilik, min ngᵾn mundᵾk iting uⱡ ei pilik rundᵾk, Pita kᵾn, elim nga rᵾⱡaip ila wu kᵾⱡ, waldᵾk nᵾk mel, “Angmᵾn! Tᵾn etᵾp itamᵾn mel nant?” nᵾtᵾng. 38 Wote Pita ndi, wamp mbᵾ, kundpa nimba mel, “Enim wamp tenda tenda nᵾk, numan ropᵾl rok, Jisas Kraist nga mbi ila nu tᵾi nitim. Enim uⱡ ei mel eng ndam, Got ndi, enim nga uⱡ kit mbᵾ, wak ropa, wote enim Got ndi, elim nga Muⱡnga Wingti ei, enim wei gem ngumba. 39 Got ndi, enim kᵾn, enim nga mek teng kangambuⱡa mbᵾ kᵾn, wote wamp muⱡ uⱡ kona mbila mormin mbᵾ kᵾn, wote Got elim ndi, nimba mᵾi ropa wi ropa, rukᵾr tᵾm wamp mbᵾ, Muⱡnga Wingti ei, nguimp,” nitim.

40 Pita ndi, ik elpa mat ronduⱡ mundpa, nimba mel, “Uⱡ kit enmin wamp mbᵾ kᵾn, tᵾk rak nduk, ᵾndi nᵾndᵾi! Enim uⱡ kit mbᵾ ndi, tᵾmba ei nga, pilik kongundᵾk muⱡᵾi!” nitim. 41 Ei kᵾn, Pita nga ik nᵾtᵾm ik ni, wamp minal pilik tᵾk, wote nu tᵾtᵾng. Ui ei kᵾn ku, mondᵾp pili wamp 3000 kᵾⱡ kᵾn ok, tᵾk tenda etᵾk morung.

Mondpa Pili Wamp Mbᵾ, Kongun Tenda Mundᵾk Etmin.

42 Wamp nimbᵾ ndi, Jisas nga nombuⱡa rung wu kᵾⱡ ndi, ik mbo rondrung mel pilik, rup rok molk, atinga rok, Got nga mbi paka rok, bret puk rok nok etᵾng.

43 Uⱡ ni kᵾn, nombuⱡa rung wu kᵾⱡ ndi, uⱡ rᵾpᵾndi minal mat elingina, wamp nimbᵾ ndi kandᵾk, min ngᵾn mundrᵾng. 44 Mondpa pili wamp nimbᵾ, en enim nga numan orunga omba, tenda puⱡnga, atinga tᵾk tenda etᵾk rok, en enim nga mel mbᵾ, tᵾk tenda etᵾk, tᵾn nga mint nᵾk pᵾtᵾng. 45 Wote wamp mbᵾ, en enim nga pana rᵾng na, kng mel na nimbun, rarᵾp rok, ku moni tᵾtᵾng nimbᵾ ndi, wamp kurpa nimbᵾ kᵾn, mok rok ngᵾk etᵾng. 46 Rumbᵾⱡ mbila rᵾk rᵾk ok, tenda puk, manga wingti ou ila atinga rok, wote bret mbᵾ, en enim nga manga mbila, rak nduk molk nok, numan kun kai ei pilik molk, Got nga mbi paka rondᵾk, wote wamp minal ndi, enim kᵾn numan kai pilik etᵾng. Rumbᵾⱡ ant mbila rᵾk rᵾk, Nuim ei ndi, wamp kont nga mat etpa, wamp mbᵾ kᵾn tilinga, mondpa pili wamp nga rᵾⱡaip ei, mam itim.